KOORD
 

زاخاوی مێشک

 
 


له چێشتی مجێور دا هاتووه:
تازه له به‌غدا دوکانم دانابو. ده‌گه‌ڵ دانشجوێکدا به ناوی مه‌زهه‌ر دۆست بوین. چه‌ند ساڵێک بو لێک هه‌ڵبڕابوین. ڕۆژێک کوڕێک هاته لام.، زۆر به گه‌رمی چاک و خۆشی ده‌گه‌ڵ کردم.

-         
ئای کاکه چۆنی؟ خه‌به‌ری کاک حه‌میدی برات؟
-         
حه‌میدی چی و برای چی؟
-         
کاکه تۆ مه‌زهه‌ر نیت؟
-         
های قسه‌ی قۆڕ! چه‌ند پێکه‌وه هه‌واڵ بوین؟ چۆن نامناسیه‌وه؟ کوڕی شێخی داره خورمام!
-         
ئای ڕاست ده‌که‌ی، ببه‌خشه!
-         
به‌خوا دڵم زۆر لێت ئێشاوه، ئیتر نه‌چی ئه‌وجار منت له‌ بیر بچێته‌وه!
-         
نه‌خێر خاترجه‌م به!
ڕۆژێک له ئیداره‌ی مه‌بانی عام یه‌کێک هاته لام. له دڵی خۆمدا گوتم: بڕوانه من چه‌ند نازیره‌ک بوم، ئه‌و مه‌زهه‌ره‌ چۆنم لێ گۆڕابو. هات سه‌لامی کرد. کۆکایه‌کم بۆ بانگ کرد.
گوتم:" کاکه چۆنی؟ خه‌به‌ری کاک حه‌میدی برات چیه؟"
هه‌ستا گوتی:"شه‌رته کۆکات ناخۆمه‌وه! تۆ دیاره ده‌ته‌وێ من ئاشنات نه‌بم، گاڵته‌م پێ ده‌که‌ی. پێم گوتی من کوڕی شێخی داره خورمام!" ڕۆیشت و نه‌گه‌ڕاوه.
 له شۆڕشدا ڕۆژێک له شه‌قڵاوه نانی نیوه‌ڕۆم خوارد. کوڕێکی مه‌سیحیشم کربوه میوانی خۆم. گوتیان پوڵه‌که‌تان ئه‌و ئه‌فه‌ندیه داویه، لێم روانی به پێکه‌نینه‌وه هات:

-         
کاک هه‌ژار چۆنی؟
-         
جارێ توخوا پێم بڵێ تۆ کوڕی شێخی داره‌خورما نیت؟
-         
یانی چی؟ ئه‌گه‌ر وا بێ نام ناسیه‌وه، من مه‌زهه‌رم!
-         
ده‌ی کاک حه‌میدی برات چۆنه؟
-         
زۆر باشه و سه‌لامت لێ ده‌کا.
نه‌قڵی خۆم و شێخی داره‌خورمام بۆ گێڕایه‌وه. تێر به زیره‌کیه‌که‌م پێکه‌نی!