|
جاروباره به خوێندنه‌وه‌ی هێندێک وتار یان هه‌ڵبه‌ستی ئینتێرنێتی ، وه‌بیر
مه‌ته‌ڵێکی فارسی و چۆنیه‌تی وه‌سه‌ر زمان که‌وتنی ئه‌و مه‌ته‌له ده‌که‌ومه‌وه.
ده‌گێڕنه‌وه:
بۆ یه‌که‌مجار که ده‌زگای تێلێگراف بۆ ناردنی بروسکه له ئێران دامه‌زرا، خه‌ڵک
ئاگاداریان له‌و خزمه‌ته نوێیه نه‌بو. ناچار ڕایانگه‌یاند:"هه‌ر که‌سه‌ی
ده‌یه‌وێ په‌یامێک به خێرایی بۆ خزم و دۆستی له شوێنی تری ئێران بنێرێ،
ده‌توانێ به مفته ئه‌و کاره بکات". خه‌ڵک به بێ بڕوایی و ته‌نیا بۆ کات
بردنه‌سه‌ر، هێندێک وشه و قسه‌ی بێ مانا و کورد گوته‌نی "قسه‌ی قۆڕ"یان بۆ
ناسیاوه‌کانیان ده‌نارد. دوای یه‌ک دو ڕۆژ دیتیان وه‌ڵامی له‌و چه‌شنه له
لایه‌ن ناسیاوه‌کان به ده‌ستیان ده‌گا. ئه‌وانیش جوابیان به قسه‌ی بێتامتر
ده‌نارده‌وه. تا ئه‌وه‌ی که کاربه‌ده‌ستان دڵنیا بون خه‌ڵک بروسکه‌ناردنیان
ناسیوه. ئه‌وه بو له سه‌ر په‌نجه‌ره‌ی به‌شی تێلێگراف نوسرا:" حرف مفت تمام شد"
(واته قسه‌ی مفته ته‌واو بو). دوای ئه‌مه بۆ هه‌ر وشه‌ی بروسکه ده‌بو پاره بدرێ
و له ئاکامدا قسه‌کان کورت کرانه‌وه و ته‌نیا له کاتی پێویست که‌ڵکی لێ وه‌ر
ده‌گیرترا. له‌و ده‌مه ڕا "حرف مفت"ی فارسی مانای "قسه‌ی قۆڕ"ی کوردی به خۆوه
گرتووه.
به خوێندنه‌وه‌ی هێندێک بابه‌تی سه‌ر ئینتێرنێت، ئه‌و پرسیاره‌م له لا دروست
ده‌بێ: "ئه‌گه‌ر بڵاو کردنه‌وه‌ی بابه‌ته‌کان به پوڵ بایه، بڵیی جه‌ماعه‌تێک به
بێ خوێندنه‌وه و زانستی پێویست، وتار و شێعریان نوسیبایه و بڵاویان کردبایه؟"
|